"Meliponicultura": Geschichten und Wissensaustausch
Geschichten
U ajtsolil k’iino’ob
Xook K'iin
Dieser Text ist auch in anderen Sprachen verfügbar:
The Counsel of Time (Englisch)
Der Berater der Zeit (Deutsch)
El Consejero del Tiempo (Spanisch)
U súutukil u maan,
U súutukil u juum,
U súutukil tu’ux yaan kaambal.
U súutukil u ti’al u’uybil
U súutukil u ti’al paakat
Tsol xikin,
Xook k’iin,
Yéetel k paakat,
yéetel u juum kuxtal,
Ku k’uuchul t puksi’ik’al,
Yéetel u juum yóok’ol kaab
Yéetel u k’aay chan mukuy
Yéetel u k’aay chan sakpakal
Mukuy juujuuu, juujujuu
Sakpakal wuuru uju, wuuru uju,
Tu yáax k’iinilo’obe’ ku chíikpáajal u k’u’ chan yuuyaj
tsiiii, tssiii, iii,
Chowak, koom, tsiii, tsiii, iiii,
U chan k’u’ ken u síijto’on te ja’aba’
Chowak, koom,
Ya’ax, k’ank’aan a k’u’,
Ba’ax ku taaal te k’ino’oba’
Chowak, koom wáaj,
Jujump’íitil ilik wáaj yaan u síibal to’on u k’aaxal ja’
Yaan wáaj u loolankil ki’ichpam lu’um
Wáaj Yaan u síikto’ob ixi’im,
Uti’al jaantbil, u ti’al tséentikbáaj,
K’iino’ob uti’al k ilik, u ti’al k u’uyik,
Chéen cha’antik bix u maan k’iin,
K’iino’ob ku núukik to’on
Bix u maan súutukilo’ob
K puksi’ik’ale’ ku ki’imak kúunsik k óol,
Ki’ichkelem lu’um ku ts’aik to’on k janal,
Kaláantbil uti’al ma’ u k’aastal,
Ba’alche’ob ku ye’esik to’on
Bix u kuxtal yóok’ol kaab,
Yaan chaak
Mina’an chaak,
U k’aay ch’iich,
U k’aay tsuutsuy,
U k’aay chan xk’ook’
U k’aay chan mukuy
U xiik’nal xkusam
U xiik’nal ts’unuum
A k’aay Yaan ba’ax u k’aat u ya’ale’
A k’aay ku beetik ch’enxikintikech
A k’aay ku loolantik yóok’ol kaab
Chéen k’a’abéet xookik
Le u ka’ansajil k noolo’obo’
Ku xíimbal yéetel k kuxta’al
Bix máansik ti’ k paalal.
Chan síiniko’ob ku pirinsúuto’ob,
Yaan u k’aaxal chaak
Ma’ tu k’aaxal chaak
Yuum k’iin
Nojoch a peet
Chichan a peet
Ku ya’alik bix le yáax yéetel u ts’o’ok k’iino’ob
Xook k’iin
U tsol xikin uti’al k kuxtal
U tsol xikin ti’al kalantik yóok’ol kaab,
U k’aay ch’íich’o’obe’
U tsol xikin k puksi’ik’al.
María Elisa Chavarrea Chim
Omar Said Charruf, Cosmos, 2022
Omar Said Charruf, Cosmos, 2022
